Psa 29 | TUCT | STEP | Mbouŋ to David Yam aŋela ariaŋamim to sambam, apakur Yoova. Apait eeza pa tapiri ve poia tooni.

aMbo 103:20

bMbo 96:7+

dYo 12:28+; Syg 4:5

Psalms 29

Maaron aliiŋa ila uman ve lalaav

Mbouŋ to David

1 Yam aŋela ariaŋamim to sambam, apakur Yoova.
Apait eeza pa tapiri ve poia tooni. ^a

2 Apait Yoova! Pa i eeza tiina kat.
I ipabood tauu pa ŋgar tooni patabuyaaŋ.
Tauvene aput aghemim pani ve apaiti. ^b
3 Yoova aliiŋa ^{▼▼(29:3) Yes Kanaana tisuŋsuŋ pa maaron karom ee, eeza Baal. Yes tighe Baal iŋgin nugh. I igham uman izizi, ve igham nugh ighani milia. Ve i ta igham aniiŋ to uum itum poi. Yes Israela titoor mbouŋ tane to titatan ŋgar karom tawe. Ve tighe Baal igham uraat tawe mako. Yoova ta ighamu. Tauta ighe lalaav luutu, mako tighe ene Maaron aliiŋa.}
ila irau te ziige ta naol ne.

Maaron tau eeza tiina na aliiŋa, ene imin lalaav luutu.
Yoova isaav toman aliiŋa tiina izala te paavo. ^d

4 Yoova aliiŋa, ene tapiri tiina.
Aliiŋa itotoia ighe i eeza tiina kat.

5 Yoova aliiŋa iŋgalŋgal valaghin ai mezepur tintiina to Lebanon.
Aliiŋa iŋgalŋgal mbirisai zi.

6 Yoova aliiŋa itok loloz tintiina to Lebanon, le tiyatyaat imin makau natŋa paghpaaghu tau tintinizi.
Ve itok loloz Ermon, le iyatyaat imin bapolo sagsagŋa natuzŋa tau tintinizi.

7 Yoova aliiŋa igham nugh ighani milia, ve yav ighan.

8 Ve itok taan to nugh ŋginaaŋa le irur.
Igham nugh ŋginaaŋa to Kades katkatia ilala ilamlam.

9 Yoova aliiŋa igham mekmek sagsagŋa tau apozi na, tirur le tipoop pataghaaŋ.
Ve igham ai raua tisov timburur tizi.
Tauvene tamtamon tisov tau tilup zi pa suŋuuŋ ila rumei tooni loolo na, tisaav toman aliŋazi tiina tighe: “Tapait Yoova eeza. Pa i tapiri tiina kat!”
10 Muuŋ, yaa ivot toman tapiri ve itav taan. Saawe tana, Yoova ileep ila niia to ghamuuŋ pooz ve iŋgin gabua.
Ve aazne paam, i kinik tau ileep ila niia to ghamuuŋ pooz.
Pooz tooni pale ighengheen tauvene taghon taghon gha ila.

11 Yoova ighamgham tapiri pa tamtamon tooni.
I pale ighur poia tooni izazaa toozi, ve iŋgin zi tileep poi toman lolozi luuma.